العيون دائما ما تحمل السحر الخاص بكل فتاة وده لأن جمال العين له تأثير خاص جدا في إظهار جمال الوجه....
...
وهنا يأتي دور الماكياج لكي يساعد في إبراز هذا الجمال والسحر
ولأن الاعتدال والبساطة هما أفضل شيء في الماكياج وبالذات ماكياج العيون.. قررت أني أتكلم في كل أسبوع
عن أداة من أدوات ماكياج العيون وكل اللي عليكوا أنكوا تتابعونا كل أسبوع..
قلم الكحل من أهم أدوات الماكياح المستخدمة في ماكياج العيون لأنه من أكتر الحاجات اللي بتبين جمال العين وكمان فيه بنات كتير بتكتفي بالكحل وهي خارجة رايحة الجامعة أو الشغل...
إزاي تشتري قلم كحل كويس؟!
بصي يا ستي من أهم مواصفات قلم الكحل الكويس إنه يكون طري جدا لأنه بيكون داخل عينيكي وفوق عينيكي ودي مناطق حساسة جدا علشان كده يا ريت إنك تجربيه على إيديكي قبل ما تشتريه لأن أحسن نوع كحل كويس هو اللي بيكون طري وبيعمل لون تقيل على الإيد ويا ريت كمان إنك تشتريه من مكان مضمون وموثوق
أقلام الكحل بألوان متعددة
دلوقتي بقى فيه أقلام كحل بألوان كثيرة أوي غير الأسود والبني فممكن إنك تلاقي ألوان زي الأخضر والموف والفضي والذهبي يا ريت تحرصي إن الألوان دي تكون موجودة عندك وده لأنك ممكن تحتاجي ليها علشان ترسمي عينيكي بألوان مناسبة لألوان ملابسك وخدي بالك إنك تحطي الألوان الغامقة فوق عينيكي لإن الألوان الفاتحة بتخلي العين تظهر بشكل باهت.
إزاي ترسمي عينيكي بالكحل؟!
فيه بنات كتير أوي بتلاقي صعوبة في رسم عينيها بقلم الكحل مع إنه سهل جدا والطريقة الصحيحة والسهلة علشان ترسمي عينيكي بالكحل هي إنك تحطي مراية صغيرة تحت عينيكي علشان تقدري تشوفي رسمة العين من فوق وتمشي بالقلم من أول العين لآخرها ويا ريت تدخلي بيه كمان على خط الرموش لإن أحيانا بيكون أسفل خط الرموش فاتح وده بيعمل شكل مش حلو ومش لازم تحددي عينيكي كلها يعني من فوق بتحدديها كاملة ومن تحت على حسب شكل عينيكي.
وعلى فكرة كل عين ولها رسمة معينة تظهر جمالها فمثلا لو...
* عينيكي صغيرة
يبقى تحدديها من فوق كلها بالكحل ومن تحت بتحدديها بخط رفيع جدا يبدأ من نص العين إلى الخارج وممكن ترسمي داخل عينيكي بلون فاتح زي الأبيض أو الرمادي أو الأوف وايت والطريقة دي بتدي شكل أوسع للعين.
* عينيكي واسعة
يبقى تحطي الكحل من فوق وعلى الرموش وداخل العين وكمان ممكن تحطي تحت الرموش خط أسود أو رمادي والطريقة دي هي أحسن طريقة علشان تعالجي مشكلة العين الواسعة أو البارزة.
وفيه ناس كتير مش بيحبوا إنهم يحطوا كحل تحت العين لكني بانصحهم بإنهم يحطوا الكحل تحت وداخل العين لإن ده بيدي نظرة عميقة ومشرقة وبيوسع العين وكمان ممكن تستخدمي فرشاة صغيرة مع قلم الكحل علشان تحصلي على الشكل الدخاني وده بيخلي العين شكلها حلو أوي وبيعمل نظرة جذابة للعين وشكله مش بيكون باين إنه قلم صريح.
وفي النهاية أحب أقول لك إنك ممكن تتغلبي على مشكلة إن الكحل بيسيح بإنك تحطي كونسيلر أو كريم أساس أو بودرة مضغوطة تحت الرموش على طول وبعدين ترسمي عينيكي بقلم الكحل وبعد كده تسيّحي البودرة بفرشاة علشان شكلها ما يبقاش صريح أوي ودي أحسن طريقة علشان تحطي الكحل من غير ما يسيح
